تأملات رمضانية

المشاهد التالية ليس بالضرورة أنها وقعت في رمضان لكنها تأملات عن أحوال المسلمين تصلح لشهر رمضان وغير شهر رمضان

المشهد الأول:

في مكان ما من ألمانيا

في الصيف

أربعة من جامعة الأزهر، معيدون ومدرسون مساعدون، يدرسون علوم اللغة الألمانية وآدابها، يبحثون عن جامع يصلون فيه صلاة الجمعة الأولي لهم في هذه المدينة. يرون أحد أهالي المدينة ممن يتمتع بملامح عربية، يتوجهون إليه ويسألونه بالألمانية عن مكان الجامع. يدور بينهم وبينه، وهم في طريقهم للجامع هذا الحوار، ولكن بالعربية هذه المرة بعد أن تم التعارف السريع واتضح أنهم كلهم من المتحدثين بلغة الضاد.

هو: والأخوة من وين؟
هم: من مصر، وحضرتك؟
هو: من فلسطين
هو: وايش بيعمل الأخوة هنا في ألمانيا؟
هم: عندنا منحة لتجميع المادة العلمية اللازمة لرسائلنا العلمية
هو: وايش بيدرس الأخوة؟
هم: الجرمانستك
هو: وايش يطلع هذا الجرمانستك؟
هم: علوم اللغة الألمانية وآدابها
هو: وايش يفيد هذا الجرمانستك الإسلام؟ ودون أن ينتظر منهم أي إجابة أردف قائلا: هذا والله علم الظلاله (أي الضلالة).
هم: هو ده الجامع مش كده؟
هو: أي نعم، هو ده المسجد، اتفضلوا
هم: حضرتك الأول، وبعدين احنا
هو: لا والله، اتفضلوا انتم، أصلي أنا ورايا مواعيد ومش فاضي النهار ده، بس يا ريت يا أخوة تدرسوا حاجة تانية غير هذا الجرمانستك، لأنه علم الظلاله!!!!

المشهد الثاني:

في أحد المساجد الصغيرة في القاهرة المحروسة

بعد آذان صلاة العصر في إنتظار إقامة الصلاة

أحد المصلين ومصلى آخر

المصلي أ: يا عم الشيخ ما تقيم الصلاة والنبي!
المصلى ب: هو كان جامع أبوك، تقيم الصلاة على مزاجك، مش قادر تستني العشر دقايق بين الآذان والإقامة؟!
المصلي أ: معلهش، أصلي أنا مشواري بعيد وعايز ألحق المترو
المصلي ب: ايه يعني رايح فين إن شاء الله؟
المصلي أ: رايح حلوان

المصلي ب: يا نهار منيل، حلواااااااااااااان، ده مشوار سقع بجد، بقولك ايه يا عم الشيخ، قيم له الصلاة قيم!!!


المشهد الثالث:

في مكان ما من ألمانيا، وبالتحديد في مدينة كارلسروها

أنا: أزيك يا ام عصام؟
هي: بخير والحمد لله، وانتم أخباركم ايه؟
أنا: نحمد الله، كله تمام، بنستعد لرحلة الرجوع للوطن، وانتي، مش المفروض برضه منحتك خلصت؟
هي: أيوه، لكن احنا مش راجعين
أنا: ازاي يعني؟
هي: جوزري سجل في الجامعة هنا وعلى حس التسجيل ده حنقعد في البلد دي، حيشتغل وأنا كمان
أنا: ايوه، بس لما الجامعة تبعت انه ما بيحضرش المحاضرات والامتحانات؟
هي: يلغي تسجيله في الجامعة دي ويسجل في غيرها وهكذا
أنا: بس ليه حتعملوا كده؟
هي: والله بص، بلاد الكفر حالها ما هو حال، لكن بلادنا برضه المعايش فيها صعبة، وعشان كده حنقعد هنا

تركتها ومازالت جملة "بلاد الكفر حالها ما هو حال" ترن رنينا مدويا في عقلي قبل أذني.


المشهد الرابع:

في مكان ما في القاهرة

في شهر رمضان، الساعة الثانية ظهرا

عم مختار بائع الفاكهة المعروف عنه هدوئه وتجنبه المشاجرات والمشاكل حتى أنه أصبح مصلح النفوس بين المتشاحنين من التجار، يمسك بخناق أحد الصبية الذي دخل أعتاب الشباب. يتجمع حشد من المارة الذين يعرفون الرجل يحاولون تخليص الصبي من أنياب يديه، وهو مصر على عدم ترك الصبي إلا بعد تأديبه عقابا له على فعلته.

هم: يا عم مختار ما تسيب الولد، هو عملك ايه؟
هو: مش حاسيب دين أمه النهارده.
هم: استغفر الله يا عم مختار، دا احنا عمرنا ما شفناك متنرفز كده، هو اللي بس حصل؟
هو: الواد ابن دين الكلب ده، بيهزر مع واد صحبه وراح شاتمه بالدين في عز نهار رمضان وعشان كده مش حاسيبه إلا لما يتأدب.
هم: ما هو خلاص يا عم مختار أخد كام قلم حلوين منك على وشه، سيبه بقى
هو: عارف تسب الدين تاني في رمضان ...

ترك عم مختار الصبي وتوجه إلى كرسيه الملاصق لعربة الفاكهة، يجلس عليه، ويتناول آخر رشفة من كوب الشاي البارد وآخر أنفاس حجر الشيشة التي كان يدخن فيها في هدوء إلى أن قطع هذا الصبي بسبابه الدين حُرمة هذا الشهر الفضيل عند هذا الرجل الفضيل.

مشهد الختام

القاهرة، عند أحد موائد الرحمن المنتشرة في عرض البلاد وطولها

قبل آذان المغرب بدقائق معدودات

يتقدم رجل بأرجل مرتعشة نحو الرجل المسئول عن تنظيم المائدة ثم يولي عنه الأدبار فيصيح به مسئول المائدة أن يأتي:

الرجل: أنا كنت عايز أفطر معاكم؟

مسئول المائدة: يا راجل وهي دي حاجة محتاجة استئذان، طب وإيه اللي مشاك؟

الرجل في تردد : أصلي أنا مش مسلم

مسئول المائدة: يا سيدي هي اسمها ايه، مائدة المسلمين ولا مائدة الرحمن؟

الرجل: ما ئدة الرحمن

مسئول المائدة: طيب، طالما إن رحمته بتظل كل العباد أتفضل اقعد وافطر معانا

يجلس الرجل، وما هي إلا لحظات حتى كان الرجل يضع أولى التمرات بين شفتيه، متمتما مع آذان المغرب كلمات لم استبين لفظها لكني فهمت مقصدها من حركة يده.